اشعار ادبيه

. إنضباط …

إعلان

خاص ع المكشوف

بقلم / اسماعيل شتا شمس

……. بمناسبه قضيه الخروف التي إنتشرت مؤخرا وسط البلاد
وزعم البعض أن الخروف قد مات بالجلطه كما أكد الدكتور البيطري ؟؟
أحب ابشركم بأن الخروف مازال علي قيد الحياه وهو في أتم صحه وعافيه
وأصبح عنده إحساس وبقا بيحلم كمان !!!
فقد قامت جميع وسائل الإعلام المرئي والمسموع وجميع الصحف الورقيه والإلكترونيه
في شتي أنحاء البلاد بالتوقف عن البث والنشر لأجل غير مسمي
بسبب إنضباط جميع الأوضاع في البلاد
ولم يعد هناك اي مشاكل وقضايا يمكن الحديث عنها ،
وكمان علشان الخروف بقا بيحس !
وخريج الهندسه اللي ماكنشي لاقي شغل بقا مهندس كبير !
وخريج تجاره إنجليزى وكان واقف فى سوق الخضار أصبح وكيل وزاره !
وخريج الأداب اللي كان بيسوق تاكسي أصبح أكبر تاجر سيارات في البلاد!
وخريج الحقوق اللي كان بيشتغل سمسار بقا أكبر محامي في البلاد !
وخريج الزراعه اللي كان جايله تعين في الطرق والكباري بقا مدير الطرق والكباري!
والراجل اللي كان مديون و مش عارف يسدد ديونه أصبح من كبار الملاك في البلاد !
والشباب اللي كانوا مستنين دورهم في التعيين من خمسه عشر سنه كلهم اتعينوا وتم القضاء علي البطاله نهائيا !
تم إلغاء الفيس بوك نهائيا علشان ماعدتشي فيه ملل وزهق ونقص وحرمان !
كل أبنائنا لابسين احلي الملابس وبقا فيه إكتفاء ذاتي وبأرخص الأسعار !
تم القضاء علي مشكله الإسكان نهائيا والشقق بقت فاضيه مش لاقي اللي يسكنها من كثرتها وكل واحد بقا عنده بدل الشقه خمسه وتمليك مش إيجار !
والناس اللي كانوا واخدين قروض من البنوك وكانوا متعثرين عن السداد الدوله سدت عنهم هذه القروض واتصلحت معاهم !
الكهرباء بقت بالمجان !
المياه بقت بالمجان !
الغاز بقا بالمجان !
والنت كمان بقا بأحدث السرعات وبقا نت فائق السرعه وكمان بالمجان !
لم يعد هناك إحساس بالغربه في بلدك بقينا ولاد البلد ، ولو سألتك إنت مين حتقول بالطبع أنا إبن بلدي !
الدنيا بقت ميه ميه والعيشه ميت فل واربعه عشرين قيراط !
تم ضبط الأسواق والأسعار أصبحت في متناول الجميع !
جميع الثروات اللي في البلد بقا ليك نسبه فيها وشاركنا الحكومه وبقينا حبايب !
ماعدتشي فيه حكومه فاشله ولا نواب الحصانه ولا إعلام فاسد ولا صحافه كاذبه .كل واحد بقا بيحكم نفسه ماهو كل شئ متوفر وفي متناول الجميع !
اللي بيطلع معاش ..معاشه بقا مكافيه وفايض منه كمان لدرجه إن اصحاب المعاشات بقت اصحاب مصالح وشركات !
مياه الشرب اصبحت نظيفه نقيه خاليه من أي أمراض !
ماعدتشي فيه حد خايف من سيديهات مرتضي منصور لأنها بقت موضه قديمه إحنا بقينا في عصر الإنفتاح !
الجنيه المصري متصدر العملات والجنيه المصري إغتصب الدولار وجاب منه عيال كمان وكمان !
ماعدتشي فيه حاجه اسمها أنا كان نفسي !
كل اللي في نفسك أمر ومجاب والتنفيذ فوري !
مافيش حاجه اسمها أهلي وزمالك . أهلي وأهلك بقوا أهلي وأهلك !
الرياضه بقت أخلاق
ويوم ليك ويوم عليك
ويوم مكسب ويوم خساره
واللي يكسب نفرح لفرحه !
بدل السمك بقا فيه جمبري وكابوريا وسبيط والفسفور علي كل شكل وطعم ولون وكله في متناول الجميع وبأرخص الأسعار !
اللحمه بقينا بنرميها من كثرتها والكيلو بقا بخمسه جنيه والحسابه بطلت تحسب !
الأرز بقا مالي البيت من كتره بقينا نرميه للسمك والكيلو ب 2.5 وتعالي بنفسك وبص !
التموين بقا يجيلك لغايه البيت وكله من مجميعه علي كل شكل ولون وبالمجان !
الفاكهه بقينا بنرميها من كتر وجودها وقبل أونها …
مشمش تفاح بطيخ كاكا برقوقوق ماعدتشي فيه حرمان من حاجه !
الحموات بقوا اطيب ناس وبقو بيهدوا النفوس ويتحطوا علي الجرح يطيب !
ورجع الترابط الأخوي تاني وبقا الاخوات والقرايب بيزوروا بعض ورجعت صله الرحم من تاني !
التعليم بقا عندنا في المرتبه الأولي وأولادنا بقوا في تفوق ونجاح مستمر والحاله التعليميه بقت في أحسن حال !
الأمن بقا مستتب وتم القضاء الكامل علي الإرهاب في أنحاء البلاد وسيطره كامله علي تجار المخدرات والسلاح والقضاء علي السوق السوده !
اتغير مبداء الحسنه بتخص والسيئه بتعم ،،، وبقت الحسنه بتخص والسيئه ايضا بتخص واللي يغلط يتحاسب !
الجواز بقا بالحب وباالموده مش بالذهب والمال !
انتهي عصر اسواق الذهب والذهب الحقيقي هو المعدن الأصيل ، النفس الصافيه وحب الناس !
الخير بقا بالكوم واللي عايز يروح يعبي بالغلق والفاس !
مبقاش فيه حاجه اسمها فقير وغني ،، كلنا بقينا زي بعض !
بقا فيه أدب وأخلاق وحياء وإنتماء !
وبقا فيه كمان تقوي ودين !
بقا فيه إحساس وحب وموده !
كل اللي كنت بتحلم بيه بقا متاح ومتوفر !
فيه حاجه ناقصه كمان … أيوه السعاده مبقتشي في المال
السعاده بقت في راحه البال !

الف حمدالله علي سلامتك ايها الخروف الحساس

شكرا للإعلام والصحافه علي نشر الواقع المفرح الذي أسعد الخروف وأسعدنا معه !
شكرا لهذه اللمسات الجميله والتطور والتقدم التكنولجي والحيوي في شتي انحاء البلاد !
شكرا ثم شكرا ثم شكرا ……….

كفانا إحباط … شويه فرفشه !!!
هو الحلم عيب ولا حرام
يلا بينا نحلم قبل الحلم ما يبقي كابوس وكمان بفلوس !

‫#‏خواطر‬ ‫#‏من‬ ‫#‏مؤلفاتي‬
بقلمي / اسماعيل شتا شمس

مقالات ذات صلة

رأيك يهمنا شارك الان

زر الذهاب إلى الأعلى