أخبار مصر

عندما يكون للمرأه شنب

إعلان

بقلم / د.مي مجاهد



بحماس منقطع النظير وشعور بالفخر الغير مفهوم مصدره و بالعلم الغير معلوم علمه يطل علينا كل شويه شنب المدعوة مني أوم شنب عشان يقول للراجل أتجوز على مراتك ياعم مرة واتنين وتلاته ولو في خامس ياريت بس كده 😳 آه والله مفيش حاجة تانية أو هدف غير أنها تقوله يجوز عليها وأن مش من حقها تقول لأه مع أن عباس الضو قال لأه عادى يعنى جدا 😁.


ومش كفاية بلعين شنبها وساكتين إلا ما طلت علينا تاني والمرادي بتأكد أن 99% من الزوجات خاينين و وحشين وأن التعدد هيقلل النسبة دي كتير 😳 .


وبغض النظر اني مش فاهمة ايه علاقة خيانة الست لجوزها بأنه يجوز عليها 😒 ولا فاهمة إزاي الجواز الثاني هيقلل النسبة دي اساساً نظراً لأن أفقي ضيق وعلمي إيش وصله لشنبها العالي مقاماً وعلماً.


لكن اللي فرحني من قلبي أن الدعوة النبيلة للرجالة دي يكمن وراها خلاص الأمة من كل مشاكلها 😃 باعتبار أن مجتمعنا مايل عشان الراجل مش مرتاح ومتقلقل كده في فرشته وطلباته مش مستكفيه فلما تكفيه تبقى الدنيا فلة والمايل يتعدل والورد يفتح والدنيا تبقى لونها فحلوقي 💗فحمدت ربنا الحمد لله يارب 🙏 إنه بعتها في الوقت المناسب عشان تنور بصيرتنا وتفتح عيونا علحقيقة الغايبة عننا 👏 و أن الدنيا طلعت سهلة وأنا كنت فاكرة مشاكلنا أعمق من كده إنما لو جت على الراجل نيجي على روحنا ونكفيه وندلعه عشان حالنا يتعدل ونبقى قومنا بواجبنا زي الفدائيين كده وقت الحرب العالمية 😂


وأفتخر وبشدة إنى خدت بلوك متين من شنب مني من حوالي سنتين بعد نقاش فيس بوكي قصير لم تحتمل فيه هجومي عليها بالذوق والأدب فعملتلي بلوك ودخلت أشتكت صديق مشترك إنى تجاوزت معاها و أنا أصلا مكنتش أعرف شنب معاليها ولا سمعت عنه غير لما عملتلي بلوك إستفز بريستيجيً وخاصةً لما الصديق عرق الرجولة طفح عليه وشاف أنها نصيرة الرجالة المنتظرة ودعوتها صح الصح مع أنه مسيحي 😃 وشير صورتها معاه للذكرى والفخر بعد برنامج تليفزيوني وشفت شنبها بوضوح .


ونظراً لأني مكنش ليا شرف معرفة شنب معاليها وطلتها البهية غير وقت البلوك و نسيت حتى الموقف كله … قلت أشوف مين الست اللي بتقول علينا خاينين دي ومن أين لها بتلك الأرقام العجيبة المريبة وحملتها اللي ضد طبع الستات – الطبيعين اللي معندهومش شنب – و أفتكرت شنبها والبلوك رجع ينقح عليا 😢 من تاني وهي قاعدة بتبعزق فكرامتنا كل شوية، بس مرتحتش وهديييت غير لما لاقيت إن شنبها إخواني قديم لأه وكمان متأصل وبالأخص لما لاقيت الإخواني الإرهابي محمد ناصر عنده نفس الحملة – يامحاسن الصدف البديعة – وإنه بيدعو هو كمان برده الرجاله عشان يجوزوا ثاني و ثالث و مش بس كده لأه ده على الزوجة أن تطيع زوجها لأنه شرع الله الذي لا يجوز اطلاقاً مطلقاً مناقشته أو الاقتراب منه 😞 وكمان تحضر فرحه 👰 وتزغرط وكأن شرع الله ده بس في طلبات الراجل ومزاجه وجوازاته الأربعة وفرشته والملايكة اللي بتعد تلعن الست واللي جابوها عشانه وغير كده مفيش لا شرع ولا دين وكل عيش يابا ولا تجادل يا اخي🙊.


واللي زاد الطين بله بقه وخلاني ريلاااكس 😌 كده الدعوة اللي اترفعت على شنبها لأقالته من ماسبيرو لأنتمائها للجماعة الإرهابية وإنها كانت حلقة الوصل مع الإرهابي خيرت الشاطر لغزو فكر الجماعة داخل جدران ماسبيرو بترحيب من صلاح عبد المقصود وزير الإعلام الإخواني وقتها زي ما أعلن أيمن نور أكثر من مرة 😠 ياجماله يا أوم شنب.


والحقيقية بدأت أكره الحاج مارك أنه عمل موضوع اللايف ده في الفيس بوك لأنه بيتحفنا بابتسامة شنبها كل شوية وهي بتتكلم عن العلاقات بين الزوجين وكأنها بتكلم عن الممبار وعلاقته بشوربة الكوارع بالخضرة .


وعشان كده مش مستغربه أبداً شنبها وأفكاره المريبة عن المرأة اللي عكس طبيعتها اللي ربنا خلقها فينا و أرقامها الفالصو ولفة طرحتها اللي انقرضت من العصر البائت، لأن ناهيك عن إنها ست بشنب ده كمان طلع شنب متربى على السمع والطاعة .


والحل من وجه نظري المتواضعة أنه نسيبنا من كل حاجه بقه والجواز والتعدد والممبار والكوارع ، ولازم كلنا نطالب بضرورة تطبيق شرع الله و الإلتزام بحف الشارب عشان ميدلدلش أكثر من كده ويلحم في اللحية وكله بما يرضي الله يا أوم شنب.

مقالات ذات صلة

رأيك يهمنا شارك الان

زر الذهاب إلى الأعلى