ما تحفظه أعز وأقدس الكلام.. رسائل الرئيس السيسي للطفل حافظ القرآن

محمد محمود/ ع المكشوف

دعا الرئيس عبد الفتاح السيسي الطفل أحمد تامر الملقب “الطفل المعجزة”، والذي يحفظ القرآن الكريم، لقراءة ما تيسر من القرآن في أول افتتاح.

وخلال مداخلة هاتفية مع الإعلامي شريف عامر في برنامج “يحدث في مصر” على قناة MBC مصر، وفي وجود دكتور مبروك عطية، كانت للرئيس السيسي هذه التصريحات:

– هذه نماذج عظيمة جدا، تحياتي لابننا أحمد، بسم الله ما شاء الله لا قوة إلا بالله

– ربنا يحفظك يا ابني ويخليك لأهلك ويحميك من كل شر وسوء

– اسمح لي يا أستاذ شريف أهنيك للمرة الثانية. مكانش ممكن يعدي عليا أبدا إن أنا أشوف النموذج الجميل والرائع ده

– اسمح لي أسجل تقديري مرة ثانية ليك يا أستاذ شريف على السعة والتنوع الكبير في تناولك في برنامجك، والقضايا اللي بيتم استدعاؤها ومناقشتها، وأيضا النماذج اللي بتجيبها

– يا أحمد بسم الله ما شاء الله عليك، ربنا يا رب يحفظك ويوفقك ويكمل له بخير ويحميك أنت وأسرتك، وأهني أيضا والدك ووالدتك

– إنت عارف يا أحمد يا تامر إنت حافظ إيه؟ اللي إنت حافظه كلام ربنا سبحانه وتعالى، أعز كلام وأقدس كلام وأكرم كلام وأطيب كلام، البركة كلها معاك ربنا يحميك يا ابني

– خليني أقول على حاجة، الحفظ جميل ومهم، لكن الفهم كمان جميل ومهم

– أنا حبيت أعمل مداخلة عشان كل من بيسمعنا يعرف إن صحيح إحنا محتاجين نهتم باللغة العربية وحفظ القرآن، ونهتم أيضا بتنظيم أوقات أولادنا. لكن في نقطة مهمة أنا عايز أسجلها هنا. مهم قوي إن الأسر تبقى منتبهة لأبنائها وبناتها، وتشوف النقاط اللي ممكن أبناؤهم يتفوقوا فيها

– مش لازم فقط تكون الحافظة بتاعتهم جيدة زي أحمد، في حاجات تانية وكلها نعم من ربنا. ممكن تكون أنشطة رياضية أو أنشطة أخرى، وملكات أخرى موجودة لو نميناها واهتمينا بيها حنجد النبت الجميل يكبر ونبقى فرحانين بيه كلنا

– أقول لأحمد وكل من يسمعنا من المصريين وغيره، الحفظ لوحده من غير فهم مش كفاية

– عايز أقول لك يا أحمد أنا أدعوك في أول افتتاح تيجي تقرا لنا ما تيسر من القرآن

– أستأذن الوالد وأسرتك إنك أول افتتاح لينا تبقى الشيخ بتاعنا تقرا لنا ما تيسر من القرآن

– أنا سعيد قوي بالدكتور مبروك عطية وتناوله للقضايا المختلفة، وأنا مش حقول ملحوظة، العلماء الأجلاء ميتقالش لهم ملاحيظ

– أنا أقدر جدا الإعلام وهذا المجال العظيم، والإعلامي المخلص لرسالته له أجر كبير قوي

– كل من سمع أحمد النهاردة وهو بيقرأ، أحمد له أجر، وأسرته وإنت ليك أجر، ولا ينقص ذلك من أجر حد

– الوعي قضية القضايا في مجتمعاتنا كلها