” ناس غريبه “
خاص ع المكشوف
الشاعر مينا وجيه يطرح قصيدة جديدة بعنوان ” ناس غريبه “
وقت المصالح..الكل صالح
يسألوا عنك 200 سؤال
وقت الضيقه..يبيعوك ف دقيقه
لا تلاقي جنبك عم ولا خال
طب قولي يا قلبي هنروح لمين؟
دول ناس غريبه..مايعرفوش العيبه
يقتلوك وياخدوا عزاك كمان
كارثه ومصيبه..النخوه والطيبه
الله يرحمهم ماتوا من زمان
وخلاص راح زمن المخلصين
هتعيشها طيب..غريب وقريب
هيجرح فيك من غير أسباب
تظلم ف غيرك..وتبيع ضميرك
الكل هيعملك ألف حساب
ماشيين بالعكس ليه يا بني آدمين
الكل ساير..ومافيش ضماير
بايعين شرفهم برخص التراب
توفي ليهم..ما يتمرش فيهم
كلهم صبحوا تخصص عذاب
ماعرفش القسوه جابوها منين
تمشي بأمان..ترجع ندمان
وعينيك بتبكي طول الطريق
تسكت تداري..والجرح ساري
يسيبوك تموت في دمعك غريق
معدومين شرف ودم ودين
شاطرين خداع..لابسين قناع
الحب والطيبه والإحترام
تمثيلم هايل..في الحب خايل
دول مايستاهلوش حتي السلام
برئ منهم الوطن والدين
هامشي قوام..واسيب الأيام
ترد مكاني وتطفي ناري
ضاع مني عمري..فوضت أمري
ليك ياربي خلصلي تاري
ده إنت اللي عالم الحق فين
ناس غريبه !
كلمات : الشاعر مينا وجيه
جميع الحقوق محفوظه
إصدار : مايو 2016
