مقالات

عندما ينتحر المنطق

إعلان

 

بقلم د.مي مجاهد

في يوم من أيام ربنا وأنا مروحة كالعادة لاقي تجمع كبير لستات كتيرة 🚺
فأنا افتكرت أن في قافلة صحية 💉💊 و لاقيتني فرحانة أوووى أن الوعي عندنا – نحن الجنس اللطيف – بقه هايل كده 🙏 .
فقلبي دق عدد مهول من الدقات ودفعني الفضول و دخلت بقلب جامد أسأل واحدة من الفضليات ورسمت ابتسامة غاية في البراءة 😊.
– هو في ايه حضرتك ؟ مجمعين ليه كده ؟
– انتي صحفيه صح🔍 …
وزي البرق لاقيتها تقمصت دورالفنان حسن حسنى وهو بيصحي نيازي 📢وندهت بصوت جاهوري
يامو حمااااااااادة يامو جناااااا يامو تااااااااامر 📢
– انا قلقت الصراحه بس خليت ابتسامة البراءة على وشي زي ماهي قولت تعملي منظر😂
– ولاقيت الفاضلة أم حمادة جت وحواليها عدد كده تقريباً هي البوص بتاعهم🤔 فقالتلي وهي رافعه حاجب أنتي فانهي قناة أوعى تكون ماسبيرو ملوش عازة يا حببيتشي🙄
– ياحاجه بس افهمك …. انطلق صووت جانبي 👂 لالالاه يامو حمادة بتاعت النهار أنا عارفاها دي انتي مش واخدة بالك 🤐 دي واحدة تطوعت لتوضيح الموقف
وراحت واخداني حضن مطارات ملوش حل وانا لسه ابتسامتي على وشي بس قلبت على بلاهه شوية 😃.
ودار حوار رائع أنا استفدت منه جدا ً كان مضمونه الآتي :

– يرضيكي وقف الحال ده منهم لله البعدا 👆
– قولتلها في ايه بس طيب حضرتك؟ وبدأت أتقمص دور بتاعت النهار اللي معرفهاش اساساً😂
– هيضيعوا مستقبل العيال و الله ما يرضي حد
– بفزع قولتلها مستقبل العيال لييييه قفلوا المدرسة ؟😨
– بصتلي بقرف😒 زي هنيدي في الطيارة كده 😄 وردت مدرسة ايه و تييييت ايه 😷 اللي فيها 50 عيل في الفصل والعيال مش بيفهموا حاجه 😠 ماتولع المدارس كلها.
– ياااا 50 😱 هو فعلا العدد كبير اومال مستقبلهم هيضيع ازاي مخدوش الكتب 😢
– كتب ايه و تييييييت ايه 😷 ولا فارق كتب ولا غيرة ده فلوس وبنرميها على الأرض.
– بمنتهي التأثر رديت عليها 😥 هي المصاريف غالية كده؟
– لأه والله احنا غلابة يا ست هانم فواخدين إعفاء مصاريف😔.
– اااه😓 وأنا خلاص هعيط في حضن الست اللي جمبي
– طبطبت عليا وهي بتقولي ما بيروحوا السنتر بعد الضهر ياخدوا الدروس كلها ولا الحوجه للمدرسة يا حلوة 👏
– سنتر …. 😳 😳
– اه حاجه تمام جداً ربنا يكرمة المستر زي الفل إلهي يكرمه ياااارب و احنا من ناحيتنا مبنقصرش وبنديه الفلوس اللي بيطلبها وزيادة 👏
– سنتر ياحاجه وبتجيبوا الفلوس منين طيب 😱؟
– لاقيت واحدة باين عليها العاقلة الكُمل اللي فيهم جات قالتلي بكل هدوء…
– ربك بيرزق الواحد بيشقي عشان عياله 👶 وبيطلع اللقمة من بقه عشانهم 😔 والله يسترة مدرس الفصل بتاعهم خدهم معاه في مجموعة السنتر .
– رديت ونظرة الامومة بتنط من عيوني 👀 ربنا يخليكوا ليهم بس معلش مادام هو هو مدرس الفصل مايروحوا المدرسة أفضل دي حتى من غير فلوس؟
– سمعت صيحة استنكار وشهقات التعجب تتعالى وخفت الموقف يتطور لأكثر من كده 😒😏 فحبيت أجود وأصلح الدنيا وأحط التاتش بتاعي فقولت بكل ثقة طبعا اكيد السنتر مش زحمة زي المدرسة 💪

ويادوبك خلصت حروف الكلمة وفجأة
( نزل من العمارة اللي واقفين عندها عدد من الأطفال وهجموا علينا كالتتار
و أنتشروا في أنحاء المكان زي الوروود في الجنانين ( سامحني يارب على الكذب😒 )

– إيه ده مين دول ؟؟ وكانوا فيييين ؟؟ نزل ايدك يا بابا من على شنطتي 😠
– دول العيال خلصوا مراجعه العربي 🙌
– العربي هو ده السنتر 😳 هاااارسود ليه الحصة فيها كام عيل ياجدعاااان ؟؟ اوعى يا بني ميصحش كده يا أم تامر 😒 من فضلك شوفي تامر.
– ماهو المستر بيضم التلت فصول بتوع المدرسة يا أبله عشان يفهمهم على مهله .
– على مهله 😱😱😱
– رديت وأنا بقاوم الأطفال كأني بغرق في بحر الساحل الشمالي 😂 طب فين المستقبل ياحاجه في الوحلة اللي احنا فيها دي 🏄
– منهم لله كل يوم حمله عشان يقفلوا السنتر بس ايه هما يمشوا من هنا واحنا نفتحه للعيال من هنا طبعا ده مستقبل العيال اللي حيلتنا 😨
– 😭 أنا من غير رد تقريبا من الصدمة
– فحست أنها كسبت المعركة وكملت بكل قوة وعزيمة 💪
– ايوة اوومااال ايييييه ولازم نضحي عشانهم وبوجه رساله للريس إحنا وراك ومعاك و مصر هتفضل جامدة رغم كل الحملات دب هنقاوم لآخر نفس والقدس عربية ومحدش هياخد سينا منيينا ولا نتهز وآخر كلمة أحب أقولها ياترامب ياجبان ياعميل الأمريكان 😜😜 وتحيا مصر 👊 بووم

مقالات ذات صلة

رأيك يهمنا شارك الان

زر الذهاب إلى الأعلى