الليل البليد
خاص ع المكشوف
بقلم منصور عبد المقصود
طال انتظار الصبح فى الليل البليد
يا شمس رافضه تدّوبى فيكى الجليد
الليله كانت خارجته
طب ليه تقولوا
الليله عيد ؟؟
العمر واقف فى انتظار
لحظة عبور
لحظة تدوب فيها المحن
يللى فى دينك ممتحن
الصبر ليه بيضحك عليك ؟؟
عديت حدود الصبر
وعبرت فوق الممكنات
معقول يكون حق اللى مات
مدفون ف قبر ؟؟
معقولة تاكل من ايديه
الشهد سكر
وتحلىِِ بقه بمر صبر
انت غير كل البشر
انت شمس فى وسط عتمه
واحنا بنحب المهاتما
لانه هندى
احنا دود الارض قرفان مننا
محنا طول الليل بندعى لربنا
يا إله الكون فى عرضك
احمى أرضك
من الطوفان
م اللى بايع واللى خان
واللى عاش عمره
الجبان
مستخبى ف شق حيط
احمى أرضك م العبيط
اللى طول الليل بيهتف
واللى ع الشاشة انطبع
خاف لا يشكى من الوجع
واما اتوجع
ملقاش ايدين تتمد له
ولا حتى عين
تعطف عليه وتبصله
ملقاش فى موته
حتى كلب يوصله
ملقاش بشر
غير اللى فى قلوبهم حجر
