بالفيديو / هل تتحول قرية الشوبك إلى حمام سباحه من مياه الصرف الصحى !؟
ع المكشوف – أحمد إبراهيم
إستغاث أهالى قرية الشوبك بمركز شبين القناطروناشدوا السادة المسئولين بمختلف الجهات المعنية المتمثله بالوحده المحلية والشركه القابضة للمياة والصرف الصحى ولم يتم التوصل لحل هذه المشكلة حتى الان.
وفى حوار أجرته بوابة ع المكشوف مع أهالى القرية وبسؤالهم عن مشكلة مياة الصرف الصحى التى أغرقت منازل الأهالى ومطالبهم بحل هذه المشكله .
صرح الأستاذ “عبد الباسط جميل”، أحد أهالى القرية قائلاً : إحنا عندنا صرف صحى بس منعرفش ده إية كسر ولا عطل فنى ولا اية إحنا مش جهة إختصاص بس الوضع اللى انتوا شايفينه اهو وبناشد المسئولين بسرعة حل المشكله دى لأننا روحنا لكل الجهات المعنية زى الوحده المحلية وشركة مياة الصرف الصحى ولم يتم إتخاذ قرار فى المشكلة دى الناس تعبت بجد شوفوا حل .
وأضاف الاستاذ ” سيد إبراهيم أبو طالب “، قائلاً: نفس المشكلة اللى الناس بتتكلم عليها بس ضيف على كده بقى فية أمراض جلدية ووبائية إنتشرت بين الناس بسبب الميه بتاعت الصرف اللى مغطية القرية .
وأوضح الاستاذ “ربيع محمد”، قائلاً: إحنا خلاص دوخنا على المسئولين وخلاص بيوتنا هتقع يعنى انا عندى الميه ناشعه فى حوائط البيت عايزيين نعرف مصدر المية دى عايزين نعرف فى اية وناشدنا مسئولين كتير كلوا بيجى رسميات وطيب وحاضر وخلاص طب إحنا نعمل إية العيال الصغيرة والناس الكبيرة خلاص كلهم بقوا أصحاب مرض.
وأكمل “أحمد السيد محمد على”، قائلاً: يعتبر القرية بتاعتنا مقسومه اتنين نص داخل فية مجارى ونص مش متوصل بيه النص اللى متوصل ده بايظ خالص المواسير كلها بتصرب ميه والمفروض إن فى ملعب كورة كان مصروف علية بس للاسف بقى عبارة عن بحر متغطى بمية وريحه كريهة وامراض وعلى فكرة فى مناطق بردو بعدنا نفس مشكلتنا والناس اشتكوا وبردو محدش سائل فيهم .
وأشار الاستاذ “السعيد العماوى”، قائلاً: روحنا شبكة الميه اكتر من مرة يبعتولنا موظف ومفيش بردو حل البيوت هتقع على الناس .
وإختتم الحديث الاستاذ “عبد الرحمن أشرف “، قائلاً: المية موجوده بقالها كتير ومحدش يعرف الميه دى مصدرها اية والملعب اللى هو المفروض أصلا تبع وزارة الشباب والرياضه اللى معمول للشباب اهو غرقان والميه مغطياه ارحمونا البيوت بقت كلها هائلة للسقوط .
https://youtu.be/yzXO4jFfosM
